“Цахилгаан эрчим хүчээр хангах гэрээ”-нд гарын үсэг зурлаа.

Монгол Улсын эрчим хүчний нэгдсэн сүлжээнээс Оюу Толгой уурхайг урт хугацаанд “Цахилгаан эрчим хүчээр хангах гэрээ”-нд Цахилгаан дамжуулах үндэсний сүлжээ ТӨХК, Диспетчерийн үндэсний төв ХХК, Өмнөд бүсийн цахилгаан түгээх сүлжээ ТӨХК болон Оюу Толгой ХХК нар өнөөдөр гарын үсэг зурлаа. Оюу Толгой уурхайн хувьд цахилгаан эрчим хүч амин чухал хэрэглээ бөгөөд гүний уурхайн үйл ажиллагааг эхлүүлээд байгаа энэ цаг үетэй давхцан эрчим хүчний хангамжийн асуудлыг шийдвэрлэх нь нэн чухал үйл явдал болж байна. Ингэснээр гүний уурхайн ажилтнуудын амь нас, эрүүл мэнд, аюулгүй байдлыг баталгаажуулах, гүний уурхайн үйл ажиллагааг урт хугацаанд тогтвортой үргэлжлүүлэх нөхцөлийг бүрдүүлэх нь Монгол Улсын эдийн засгийн хувьд онцгой ач холбогдолтой юм.

Монгол Улсын Эрчим хүчний сайд Н.Тавинбэх “Оюу Толгой уурхайн цахилгаан эрчим хүчний хангамжийг шийдвэрлэж буй энэ мөч нь Монгол Улсын эрчим хүчний салбарын хувьд тэмдэглүүштэй үйл явдал болж байна. Монгол Улсын Засгийн газар болон Оюу Толгой ХХК хооронд Оюу толгойн ирээдүйн хөгжил, үйл ажиллагааг тодорхойлох өөр бусад чухал асуудлуудыг шийдвэрлэж, санал нэгдсэн том амжилтын нэг хэсэг нь болж байна” гэв.

Оюу Толгой ХХК-ийн Гүйцэтгэх захирал Армандо Торрес “Монгол Улсын Засгийн газар болон Оюу Толгой ХХК үр бүтээлтэй, харилцан ойлголцож хамтран ажилласны дүнд өнөөдөр Оюу Толгой уурхайг Монгол Улсын дотоодын эрчим хүчний нэгдсэн сүлжээнээс урт хугацаанд цахилгаан эрчим хүчээр хангах гэрээг байгууллаа. Ингэснээр Оюу Толгойгоос Монгол Улсад оруулах хувь нэмэр, өгөөж улам бүр нэмэгдэнэ” гэлээ.

Монгол Улсын Засгийн газраас Өмнөд говийн стратегийн ач холбогдол бүхий ашигт малтмалын ордууд болох Нарийн сухайт, Овоот толгой, Таван толгой, Оюу Толгойн зэс-алтны орд, Цагаан суварга, Шивээ-Овоо ордуудыг ашиглах, эдийн засгийн эргэлтэд оруулах арга хэмжээг 2013 оноос эхлэн шат дараалалтайгаар хэрэгжүүлэн ажиллаж байна.


Үүний хүрээнд дээрх орд газруудыг дотоодын эрчим хүчний системээс хангах зорилгоор 670 км урттай 220 кВ (киловольт)-ын цахилгаан дамжуулах агаарын шугам, томоохон чадлын 220 кВ-ын гурван дэд станцыг 2021 онд барьж дуусгасан.

Мөн 450 МВт-ын хүчин чадалтай “Тавантолгойн дулааны цахилгаан станц”-ыг төр өөрөө бүтээн байгуулах шийдвэр гаргаж, хэрэгжүүлэн ажиллаж байгаа бөгөөд ТТДЦС ашиглалтад орсноор Оюу Толгой уурхайн БНХАУ-ын Өвөр Монголын Өөртөө Засах Орны эрчим хүчний системээс авч буй импортын цахилгаан эрчим хүчийг орлох болно.

“Оюу толгой” ХХК-ийн тухай (www.ot.mn)

“Оюу толгой” бол Монгол улсын хамгийн том зэс, алтны компани бөгөөд Монгол улсын Засгийн газар, “Туркойз Хилл Ресурс” болон “Рио Тинто” компани хоорондын стратегийн түншлэл юм. Монголын өмнийн говьд үйл ажиллагаа явуулдаг “Оюу толгой” компани 2013 оны долдугаар сард анхны зэсийн баяжмалаа экспортод гаргасан билээ. Оюу толгойн менежментийг гүйцэтгэгч “Рио Тинто” компани Оюу толгойг дэлхийн хамгийн орчин үеийн уурхай болгохын төлөө олон улсын тэргүүн туршлага, орчин үеийн дэвшилтэт техник, технологиор хөрөнгө оруулж байна. Оюу толгой аюул осолгүй ажлын байр бий болгож, хүрээлэн байгаа байгаль орчноо хамгаалах шинэ стандарт тогтоохын төлөө ажилладаг.

"Оюу толгой"-н Фэйсбүүк болон Твиттер хаягаар бидэнтэй холбогдож болно.