​“Оюу толгой” компани Онцгой Байдлын Ерөнхий Газартай “Гамшгаас хамгаалах чиглэлээр хамтран ажиллах” тухай харилцан ойлголцлын санамж бичигт гарын үсэг зурлаа

“Оюу толгой” компани Онцгой Байдлын Ерөнхий Газартай “Гамшгаас хамгаалах чиглэлээр хамтран ажиллах” тухай харилцан ойлголцлын санамж бичигт гарын үсэг зурлаа.

Хошууч генерал Г.Ариунбуян “Танай компани, Онцгой байдлын байгууллагатай хамтран ажиллаж байгаа нь Монгол Улсын гамшгаас урьдчилан сэргийлэх чадавхыг дээшлүүлэхэд үнэтэй хувь нэмэр оруулж байгаа хэрэг гэдгийг онцлон хэлэхийг хүсэж байна. Цаашид ч гамшгаас хамгаалах төрийн бодлогыг хэрэгжүүлэх, хүн амыг аюулгүй амьдрах ухаанд сурган, гамшгийн эрсдэлийг бууруулахад санаа зорилго нэгдэн хамтран ажиллана гэдэгт итгэлтэй байна. Бидний хамтын ажиллагаа сайхан бүхэнд хүргэж, сайн үйлсийн түүчээ байх болтугай” гэв.

“Амь биеэ үл хайхран олон хүний амь нас, эд хөрөнгийг авардаг аврагч бие бүрэлдэхүүнд талархал илэрхийлье. Гамшиг осол хэлж биш хийсэж ирдэг. Гэвч гамшгийн хохирлыг хөгжиж буй орнууд ихэвчлэн амсаж байгаа нь харамсалтай. Манай компанийн зүгээс өнгөрсөн зуны үерийн гамшгийн үед техник хэрэгслийн туслалцаа үзүүлсэн ч Онцгой байдлын алба хаагчдын оролцоогүйгээр ажиллах боломжгүй байсан. Энэ бол хамтын ажиллагааны харилцан ашигтай нэг хэлбэр юм.
Ковид-19 цар тахлын үед "Оюу толгой" болон бусад компанийн үйл ажиллагааг тасалдуулахгүй үргэлжлүүлэхэд ОБЕГ чухал үүрэг гүйцэтгэсэн.
Монголчууд “Зовох цагт нөхрийн чанар танигдана” гэдэгчлэн ОБЕГ-н хамт олон бидэнд ханддаг шиг Оюу толгойнхон ч бас тэдэнд сайн нөхөр байж чадна гэдгээ харуулахыг хичээдэг юм” - “Оюу толгой” компанийн Гүйцэтгэх захирал Дэйрдре Лингенфэлдер.
Тийм ч болохоор бид хамтран Газар хөдлөлтийн гамшгийн эрсдэлээс урьдчилан сэргийлэхэд #Бэлэн_бай аяныг амжилттай зохион байгуулсан нь хамгийн ойрын жишээ.
Энэхүү санамж бичгийг байгуулсны үр дүнд Оюу толгойн уурхайн талбайд гамшиг, үйлдвэрлэлийн томоохон осол тохиолдсон үед ОБЕГ-тай хамтран, гамшигтай тэмцэх ажиллагааг шуурхай, үр дүнтэй зохион байгуулах, тэрчлэн шаардлагатай тохиолдолд олон улсын аврах багаас тусламж авах хүртэл ажиллагааг шуурхай, хамтран зохион байгуулах боломжтой болж байгаа юм. Уг чиглэлд 2017 оноос идэвхтэй хамтран ажиллаж ирсэн билээ.


“Оюу толгой” ХХК-ийн тухай (www.ot.mn)

“Оюу толгой” бол Монгол улсын хамгийн том зэс, алтны компани бөгөөд Монгол улсын Засгийн газар болон “Рио Тинто” компани хоорондын стратегийн түншлэл юм. Монголын өмнийн говьд үйл ажиллагаа явуулдаг “Оюу толгой” компани 2013 оны долдугаар сард анхны зэсийн баяжмалаа экспортод гаргасан билээ. Оюу толгойн менежментийг гүйцэтгэгч “Рио Тинто” компани Оюу толгойг дэлхийн хамгийн орчин үеийн уурхай болгохын төлөө олон улсын тэргүүн туршлага, орчин үеийн дэвшилтэт техник, технологиор хөрөнгө оруулж байна. Оюу толгой аюул осолгүй ажлын байр бий болгож, хүрээлэн байгаа байгаль орчноо хамгаалах шинэ стандарт тогтоохын төлөө ажилладаг.

"Оюу толгой"-н Фэйсбүүк болон Твиттер хаягаар бидэнтэй холбогдож болно.